- 724 -

1447. Nov. 29. Liegnitz.

Notarielle Bestätigung der Uebertragung des Patronatsrechtes über einen Altar in der liegnitzer Petrikirche durch Georg Geythan, Vicar der Collegiatkirche, an den Rath der Stadt.

In nomine domini amen. Anno a natiuitate ejusdem millesimo quadringentesimo quadragesimo septimo, indiccione decima, pontificatus sanctissimi in Christo patris ac domini nostri domini Nicolai diuina prouidencia pape quinti anno ejus primo, mercurii die, penultimo mensis Nouembris, hora vesperorum vel quasi in pretorio ciuitatis Legnicensis Wratislauiensis diocesis coram prouidis viris Ambrosio Pitschin, proconsule, Johanne Slotnig, Johanne Schobir, Caspare Rothe et Paulo Pantsch consulibus predicte ciuitatis Legnicensis, constitutus personaliter honorabilis vir dominus Georgius Geythan vicarius ecclesie collegiate sancti sepulcri dominici Legnicensis predicte Wratislauiensis diocesis, publice proposuit et allegauit, se habuisse et habere jus patronatus siue presentandi altaris sancte et indiuidue trinitatis, beate Marie virginis gloriose, santorum Petri et Pauli, Andree et Johannis apostolorum, Laurencii et Georgii martirum, Gregorii, Jeronimi, Augustini, Ambrosii confessorum et sanctarum Marie Magdalene, Katherine Barbare, Dorothee, Hedwigis et omnium sanctorum in pretorio ciuitatis Legnicensis siti, ad ipsius dumtaxat vite tempora et consequenter post ipsius mortem jus patronatus et collacionem predicti altaris ad proconsulem et consules predicte ciuitatis Legnicensis, qui pro tempore fuerint dixit pertinere. Quapropter prefatus dominus Georgius Geythan non coactus nec deceptus, sed sponte, libere et voluntarie ex certis causis ad id animum suum mouentibus jus patronatus ejusdem altaris ad ipsum, vt prefertur, spectans et pertinens eo jure, proprietate et dominio, quibus illud habuit et possedit, seu sibi competere dinoscitur pure, libere ac simpliciter et absque omni condicione juris et facti predictis proconsuli et consulibus dicte ciuitatis Legnicensis et nomine ipsius ciuitatis acceptantibus dedit, donauit, cessit et penitus resignauit, cedens et renunccians omni juri et dominio in eodem juripatronatus sibi quolibet competentibus, omni juri, proprietati et dominio in ipso altari quomodolibet competentibus in dictos proconsulem et consules penitus et imperpetuum translatis, promittens michi notario publico infracripto sollempniter stipulanti et recipienti vice et nomine omnium, quorum interest vel intererit hujusmodi cessionem et resignacionem ratam, gratam et firmam habere et inuiolabiliter obseruare nec contrafacere vel venire quovis quesito ingenio seu colore. Super quibus omnibus premissis confectum est presens publicum instrumentum per me notarium publicum infrascriptum. Acta sunt hec anno, indiccione, pontificatu, die, mense, hora et loco quibus supra, presentibus ibidem discretis et honestis viris dominis Jacobo Schrotir, Johanne Longi cappellanis apud sanctum Petrum ibidem in Legnicz, Georgio Vogeler, Gabriele Schaultes, Caspare Schaultes, Nicolao Landecke et Nicolao Morgenroth opidanis ibidem in Legnicz testibus ad premissa vocatis pariter et rogatis.
Signum notarii.
Et ego Leonardus quondam Henrici vectoris de Natscheracz Pragensis diocesis, publicus imperiali auctoritate notarius, quia predicte cessioni et resignacioni omnibusque aliis premissis, dum sic, ut premittitur, agerentur et fierent una cum prenominatis testibus presens fui, eaque sic fieri vidi et audiui, ideo quoque presens publicum instrumentum manu mea propria scriptum exinde confeci, publicaui et in hanc publicam formam redegi, signoque et nomine meis solitis et consuetis consignaui, rogatus et requisitus in fidem et testimonium omnium et singulorum premissorum.

O. d. St. L. No. 394.

Urkunden-Buch der Stadt Liegnitz und ihres Weichbildes bis zum Jahre 1455 - Herausgegeben dr Friedrich Wilhelm Schirrmacher - Liegnitz 1866